Rannsókn á líðan og starfsumhverfi kennara, náms- og starfsráðgjafa og stjórnenda í framhaldsskólum árið 2012

Árið 2011 ákváðu FF og FS að fara í samstarf við Guðrúnu Ragnarsdóttur um framhalds- og viðbótarrannsókn á líðan og starfsumhverfi félagsmanna KÍ í framhaldsskólum sem var lögð fyrir kennara, náms- og starfsráðgjafa og stjórnendur í byrjun janúar 2012.

Tilgangur rannsóknarinnar er að afla upplýsinga um:

1. Hvort breytingar hafi orðið á starfsumhverfi félagsmanna KÍ í framhaldsskólum frá fyrri rannsóknum Guðrúnar Ragnarsdóttur árin 2008 og 2010.
2. Viðhorf félagsmanna til starfsumhverfis, núverandi vinnutilhögunar og mögulegra breytinga í tengslum við vinnu starfshóps um málefni framhaldsskóla um aðlögun vinnufyrirkomulags kennara að nýjum framhaldsskólalögum, aðalnámskrá og lögum um lengri kennaramenntun samkvæmt samkomulagi KÍ/framhaldskóla og menntamálaráðherra með kjarasamningi 26. maí 2011.
3. Þarfir kennara, náms- og starfsráðgjafa og stjórnenda fyrir símenntun og starfsþróun.

Spurningalisti rannsóknarinnar skiptist í fjóra hluta, sameiginlegan og aðskilda hluta fyrir kennara, náms- og starfsráðgjafa og stjórnendur. Vísindasiðanefnd veitti leyfi fyrir rannsókninni og hún var tilkynnt til Persónuverndar. Rannsóknin er nafnlaus og fyllsta trúnaðar er gætt við meðferð og úrvinnslu gagna. Rannsóknin var kynnt í bréfum FF og FS til skólameistara og trúnaðarmanna í desember 2011. Skólameistarar veittu tíma fyrir fyrirlögnina á fyrsta kennarafundi í janúar 2012 og trúnaðarmenn dreifðu spurningalistunum til félagsmanna. Niðurstöðurnar sýna m.a. dalandi starfsánægju og lengri vinnudag. Stórir nemendahópar eru mikið og vaxandi vandamál í skólunum og eru mikil tengsl á milli þess hversu andlega erfitt kennarar telja starf sitt vera og stærð nemendahópa. Minna svigrúm er fyrir hendi til að sinna nemendum með sérþarfir og streita í starfi hefur aukist töluvert miðað við fyrri rannsóknir. Sex af hverjum 10 félagsmönnum finna fyrir streitu í starfi og þar af finna náms- og starfsráðgjafar fyrir mestri streitu.

Hér er grein Guðrúnar Ragnarsdóttur um aðferðafræði rannsóknarinnar árið 2012 og einnig fyrri rannsóknir:

• Guðrún Ragnarsdóttir, Aðferðafræði rannsóknar 2012.

Úrvinnsla og birting

Niðurstöður rannsóknarinnar verða flokkaðar eftir þemum og efninu gerð skil í bæklingum sem Guðrún Ragnarsdóttir annast. Bæklingarnir verða aðgengilegir hérna.

• Guðrún Ragnarsdóttir, Menntun, símenntun og starfsþróun félagsmanna í framhaldsskólum.
• Guðrún Ragnarsdóttir, Streita og álag í framhaldsskólum.
• Guðrún Ragnarsdóttir, Framhaldsskólalögin, ráðgjöf og aðstoð við framhaldsskóla.
   
• Guðrún Ragnarsdóttir, Fjöldi í námshópum og þjónustan í kennslustofunni.
• Guðrún Ragnarsdóttir, Lengd vinnudags félagsmanna KÍ í framhaldsskólum.
• Guðrún Ragnarsdóttir, Starfsánægja og líðan félagsmanna KÍ í framhaldsskólum.

Rannsókn á líðan og starfsumhverfi framhaldsskólakennara árið 2010

Út eru komnar niðurstöður rannsókna á líðan og starfsumhverfi framhaldsskólakennara sem voru unnar af Guðrúnu Ragnarsdóttur lýðheilsufræðingi, framhaldsskólakennara og kennslustjóra í Borgarholtsskóla í samstarfi við Félag framhaldsskólakennara. Fyrri rannsóknin var lögð fyrir vorið 2008 á miklum þenslutímum í íslensku samfélagi. Tilgangur seinni rannsóknarinnar sem fór fram vorið 2010 var að kanna áhrif efnahagskreppunnar sem hófst haustið 2008 á líðan og starfsumhverfi framhaldsskólakennara og viðhorf þeirra til framhaldsskólalaganna sem Alþingi samþykkti sumarið 2008. Í báðum rannsóknunum voru lagðir spurningalistar fyrir framhaldsskólakennara, þátttakendur í fyrri rannsókninni voru 901 og 892 í þeirri síðari.

• Guðrún Ragnarsdóttir, Áhrif efnahagskreppunnar á líðan og starfsumhverfi framhaldsskólakennara.
• Guðrún Ragnarsdóttir, Viðhorf framhaldsskólakennara til nýrra framhaldsskólalaga.
• Fréttatilkynning FF um rannsóknir Guðrúnar Ragnarsdóttur á líðan og starfsumhverfi framhaldsskólakennara, 14. október 2010.